2025 жылғы 26 қыркүйекте Астанада «Сенімге негізделген диалогтан ортақ жетістіктерге» атты Қазақстан мен Қытайдың талдау орталықтарының II форумы өтті. Іс-шараны Қазақстан Республикасының Президенті жанындағы Қазақстан стратегиялық зерттеулер институты (ҚСЗИ) мен Қытай қоғамдық ғылымдар академиясының Ресей, Шығыс Еуропа және Орталық Азия институты (ҚҚҒА РШЕОАИ) ұйымдастырды.

Форумға Қазақстан мен Қытайдың мемлекеттік органдарының, ғылыми-зерттеу институттарының және университеттерінің жетекші сарапшылары қатысты.

Бірінші сессия Қазақстан мен Қытай арасындағы саяси диалогты тереңдету мәселесіне арналды. Қатысушылар екіжақты қатынастардың эволюциясын, сыртқы саясатты үйлестіру тетіктерін және шекара маңындағы ынтымақтастық тәжірибесін талқылады. Сараптамалық алаңдардың рөліне, өңірлік қауіпсіздік мәселелері бойынша ұстанымдарды келісу мен гуманитарлық өзара іс-қимылды кеңейтуге ерекше назар аударылды.

Сессия модераторы – Философия, саясаттану және дінтану институтының Салыстырмалы саяси зерттеулер орталығының директоры Айдар Әмребаев болды. Аналитикалық баяндамамен институт сарапшысы Руслан Изимов сөз сөйледі, ол екіжақты және көпжақты ынтымақтастықтың бірнеше негізгі бағыттарына назар аударуды ұсынды.

Екінші сессияда сауда мен инвестицияларды кеңейту мәселелері қаралды. Қатысушылар тарифтік емес кедергілерді жою, сертификаттау стандарттарын үйлестіру, экспортты қолдау және индустриялық жобаларға кадр даярлау бойынша бірлескен білім беру бағдарламаларын дамыту басымдықтарын белгіледі.

Сонымен қатар технологиялық серіктестіктің перспективалары талқыланды. Сарапшылар ғылыми-зерттеу және тәжірибелік-конструкторлық жұмыстарды дамыту, жасанды интеллектіні өнеркәсіп пен мемлекеттік басқаруға енгізу, сондай-ақ киберқауіпсіздік пен жасанды интеллект этикасы бойынша ортақ стандарттарды қалыптастыру тәсілдерін ұсынды. Университеттік консорциумдардың рөлі және стартап экожүйелерін қолдау мәселелері де ерекше атап өтілді.

Жалпы, форумға қатысушылар «Қазақстан - Қытай» тұрақты сараптамалық тобының өзектілігін растады. Тараптар стандарттарды үйлестіру, нақты сектордағы жобаларды қолдау және академиялық ынтымақтастықты кеңейту бойынша практикалық ұсыныстар әзірлеуді жалғастыруға келісті.