2026 жылғы 24 сәуірде AlmaU-де «Ұлы Дала Академиясы» ғылыми орталығының салтанатты ашылуы өтті. Заманауи жаһандық сын-қатерлер жағдайында дала өркениетінің мұрасын қайта пайымдауға бағытталған жаңа зияткерлік алаң ғалымдарды, оқытушыларды, мәдениет қайраткерлерін және қоғамдық көшбасшыларды біріктіретін пәнаралық диалог кеңістігі ретінде құрылды.

Іс-шараға ғалымдар, қоғам қайраткерлері, Қазақстанның академиялық қауымдастығының өкілдері және шетелдік сарапшылар қатысты. Қатысушылар қатарында тарихшылар, философтар, әлеуметтанушылар, антропологтар, оқытушылар, жазушылар және халықаралық зерттеушілер болды.

 Орталықтың ашылу салтанатына ФСДИ атынан бас директор А.Садвокасованың жетекшілігімен Әлемдік және қазақ философиясы орталығының қызметкерлері қатысты.

Бағдарламаның айрықша сәттерінің бірі – көрнекті жазушы Шыңғыс Айтматовтың немересі Чинара Айтматованың сөзі болды. Ол Орталық Азия халықтарының гуманитарлық ынтымақтастығының маңызын, түркі әлемінің рухани мұрасын және өңір елдері арасындағы мәдени байланыстарды нығайтудағы білімнің рөлін атап өтті.

 Панельдік пікірталастардың бірінде бірегейлік, тарихи жады, мәдени мұра және гуманитарлық ғылымның даму перспективалары мәселелері қарастырылды. Талқылау барысында ФСДИ бас директоры Айгүл Садвокасова сөз сөйледі.