Философия, саясаттану және дінтану институтында Қытай Халық Республикасы Шыңжаң университетінің Саясат және мемлекеттік басқару (Ұлттық қауіпсіздік институты) институтының делегациясымен кездесу ұйымдастырылды.

Институттың бас директоры Айгүл Сәдуақасова қытайлық әріптестерді жылы қарсы алып, халықаралық ғылыми ынтымақтастықты дамыту Институт қызметінің басым бағыттарының бірі екенін атап көрсетті. Бас директор академиялық алмасудың ғылыми байланыстарды нығайтуға, бірлескен зерттеу жобаларын жүзеге асыруға және Қазақстан мен Қытайдың ғылыми орталықтары арасындағы ынтымақтастықты кеңейтуге ықпал ететінін ерекше атап өтті.

Қытай делегациясының құрамында мемлекеттік басқару, Қытайдың мемлекеттік саясаты, Орталық Азияның тарихы мен қазіргі үдерістері, этносаяси зерттеулер, сондай-ақ халықаралық қатынастар мен Орталық Азия саясаты бағыттары бойынша зерттеулер жүргізетін бес ғалым болды.

Кездесу аясында тараптар бірлескен ғылыми зерттеулер жүргізу, халықаралық конференциялар мен семинарлар ұйымдастыру, ғалымдардың академиялық ұтқырлығын дамыту, ғылыми тәжірибе алмасу және жарияланымдық қызметті дамыту сияқты ынтымақтастықтың перспективалы бағыттарын талқылады. Сонымен қатар Орталық Азиядағы қазіргі қоғамдық-саяси үдерістерді зерттеу және елтану бағытындағы зерттеулерді дамыту мәселелеріне ерекше назар аударылды.

Шыңжаң университетінің өкілдері қазақстандық әріптестерін өз институтының қызметімен таныстырып, Философия, саясаттану және дінтану институтымен ғылыми ынтымақтастықты кеңейтуге қызығушылық білдірді.

Кездесу қорытындысы бойынша тараптар әріптестік қатынастарды одан әрі нығайтуға, бірлескен ғылыми бастамаларды жүзеге асыруға және ұзақ мерзімді академиялық ынтымақтастықты дамытуға өзара мүдделі екендіктерін растады.