2025 жылғы 19 желтоқсанда Алматы қаласында «Жасанды интеллект дәуіріндегі медиа және бейбітшілік журналистикасы» тақырыбында дөңгелек үстел өтті. Іс-шараға цифрлық технологиялардың қарқынды дамуы жағдайында медиа мен коммуникациялардың трансформациясын талқылау мақсатында жетекші сарапшылар, ғалымдар, журналистер және қоғам қайраткерлері қатысты.

Дөңгелек үстелдің ұйымдастырушылары - ҚР Парламенті Сенаты, Мұсылман Ақсақалдар Кеңесі және Халықаралық конфессияаралық диалог орталығы.

Кездесудің негізгі мақсаты - бейбітшілік журналистикасы тұрғысынан медиа, этика және жасанды интеллект арасындағы өзара байланысты талқылау, сондай-ақ ақпараттық кеңістікте жауапкершілік пен моральдық құндылықтарды нығайтудың жолдарын айқындау болды. Сонымен қатар, жасанды интеллекттің қазіргі медиа кеңістігінде бейбітшілік тілін және коммуникация мәдениетін қалыптастыруға ықпалына ерекше назар аударылды.

Дөңгелек үстел жұмысына бұқаралық коммуникациялар саласындағы сарапшылар, діни бірлестіктердің өкілдері және IT-мамандар қатысты.

Спикерлер қатарында Философия, саясаттану және дінтану институтының бас директоры Айгүл Садвокасова болып, ол тақырыптық сессия аясында сөз сөйлеп, медианы цифрландыру дәуіріндегі гуманитарлық құндылықтардың рөліне қатысты сараптамалық көзқарасын ұсынды.