19 қыркүйек күні әл-Фараби атындағы Қазақ ұлттық университетінде «Жасанды интеллект туралы» ҚР Заңының жобасы және заңға тәуелді актілердің жобалары бойынша алғашқы академиялық тыңдаулар өтті.

Іс-шара әл-Фараби атындағы ҚазҰУ ұйымдастыруымен жасанды интеллект саласын Қазақстанда реттеуге бағытталған заңнамалық бастаманың негізгі ережелерін талқылауға арналды.

Заң жобасын ҚР Парламенті Мәжілісінің депутаты, Экономикалық реформа және өңірлік даму комитетінің хатшысы Екатерина Смышляева таныстырды.

Заң жобасының жекелеген бағыттарын оның бірлескен авторлары таныстырды:
• Унзила Шапак, Мәжіліс депутаты, Заңнама және сот-құқықтық реформа комитетінің мүшесі;
• Ерболат Саурықов, Мәжіліс депутаты, Халықаралық істер, қорғаныс және қауіпсіздік комитетінің мүшесі;
• Юлия Кучинская, Мәжіліс депутаты, Халықаралық істер, қорғаныс және қауіпсіздік комитетінің мүшесі.

Тыңдаулардың маңызды сәттерінің бірі - «Цифрлық қоғам және құқық» монографиясының таныстырылымы болды. Еңбекті Даулет Байдельдиновтың жетекшілігімен ҚР ҒЖБМ ҒК Философия, саясаттану және дінтану институтының мегагранты аясында жүзеге асырылған «Цифрлық трансформация жағдайындағы қазақстандық қоғам: перспективалар мен тәуекелдер» атты ғылыми бағдарлама шеңберінде орындаушылар тобы дайындады. Жақында ғана жарық көрген бұл кітап бірден өзекті тақырыпқа айналып, ЖИ туралы заң жобасын талқылау барысында Мәжіліс депутаттарына табысталды.

Бұл қадам Институт мегагрантының нәтижелері тек әлемдік цифрлық үрдістерді бейнелеп қана қоймай, Қазақстанда жасанды интеллектті дамытуға арналған заңнамалық негізді қалыптастыруға нақты үлес қосып отырғанын көрсетті.

Аталған тыңдаулар елімізде ЖИ саласын одан әрі дамыту үшін құқықтық негіздерді қалыптастырудағы маңызды кезең болды.