2025 жылдың 23 мамырында Философия, саясаттану және дінтану институтында «Қазіргі саяси ғылымның өзекті бағыттары: ұлттық және жаһандық аспектілер» тақырыбында ғылыми-әдістемелік семинар өтті. Іс-шараны Саяси зерттеулер орталығы ұйымдастырды.

Семинарға қатысушылар саяси ой-сананың жаһандық және ұлттық деңгейдегі дамуы мен өзгеруіне қатысты келесі өзекті мәселелерді талқылады:

• либералдық-демократиялық модельдің әлсіреуі және авторитарлық үрдістердің өсуі;

• жаһандық ойыншылар дәуіріндегі ұлттық мемлекеттердің егемендігіне төнген жаңа сын-қатерлер;

•‍ қазіргі заманғы ұлтшылдық түрлерінің қалыптасуы – жаһандануға жауап ретінде;

• цифрлық технологиялардың саяси санаға, азаматтардың қатысуына және биліктің легитимдігіне әсері;

• цифрландыру тәуекелдері, соның ішінде ЖИ-дің қоғамдық пікір мен саяси кеңістікке ықпалы.

Семинар барысында қазіргі әлем терең трансформациялар кезеңін бастан өткеріп жатқаны атап өтілді: бұрынғы халықаралық тәртіп жүйесі күйреп, технологиялар қарқынды дамуда. Бұл саяси ғылымның теориялық негіздерін қайта қарап, жаңа зерттеу әдістерін әзірлеуді талап етеді.

Семинар көрсеткендей, дәстүрлі аналитикалық модельдер қазіргі өзгерістерді түсіндіруге қауқарсыз. Сондықтан саясаттану ғылымын әлеуметтану, мәдениеттану, басқару теориясы және мәліметтерді талдау секілді өзге ғылымдармен ықпалдастыру маңызды.

Сонымен қатар, қазақстандық саясаттанудың рөліне ерекше назар аударылды. Бүгінде ұлттық бірегейлік, мемлекеттілік және қоғамдық келісім мәселелерін зерттеуге бағытталған өзіндік әдістер қалыптасып келеді. Бұл – ішкі мәселелерді шешуге де, халықаралық ғылыми диалогқа да үлес қосуға қабілетті ұлттық саяси ой мектебінің негізі.

Семинар соңында қатысушылар қазіргі саяси шындықты терең зерттеу үшін ғылыми қауымдастықтың күш-жігерін біріктіру қажеттігін атап өтті. Бұл – тұрақтылық, әділеттілік және тиімді басқару қағидаттарын ілгерілету үшін аса маңызды.

ФСДИ Саяси зерттеулер орталығы